Act 4 | KMU | STEP | Pitagani Yonigani yaufa mani kea hama-nepaiꞋageꞋya mono note kava vayaꞋene mono note ati kava kanoene nagoꞋa Satiusi vayaꞋene eꞋya menakayana anakayama “YisasiꞋma fali-mainefitila ago ali hetiteneanagino mukiꞋa veaꞋnea aniꞋa huꞋya fali-mainesafitila eteꞋya hetigahae.” huꞋana hamapaiꞋa yafe amaipa haviya nehae.

Acts 4

Pitagani Yoniganina kina hunatenae.

1 Pitagani Yonigani yaufa mani kea hama-nepaiꞋageꞋya mono note kava vayaꞋene mono note ati kava kanoene nagoꞋa Satiusi vayaꞋene eꞋya menakayana anakayama “YisasiꞋma fali-mainefitila ago ali hetiteneanagino mukiꞋa veaꞋnea aniꞋa huꞋya fali-mainesafitila eteꞋya hetigahae.” huꞋana hamapaiꞋa yafe amaipa haviya nehae. 3 Amaipa haviya huteꞋya anatafa hagi “Ago une kianagita ega kaiyekea hunategahune.” huꞋya kina nopi anavaleꞋya monatenae. 4 Monatayanagi kasagoꞋya veaꞋnemoꞋya anakai kea haviteꞋya amakupi maleꞋya amametiti nehae. Faefu tauseniꞋa (5,000) veaꞋmoꞋya YisasiꞋma hulatenea yafena haviꞋya amakupi maleꞋya amametitia nehae.

Pitagani Yoniganina kanisole vayate kaiyeke hunatenae.

5 FaeteꞋya koꞋma neliana kava vayaꞋene vayatamaene kahegi kema havilinaya anagaꞋene AnasiꞋa ala mono note hagote kava kanomoꞋene agaiꞋa anagaꞋene KaiyafasiꞋene YoniꞋene AlekasataꞋene mukiꞋamoꞋya Yelusalemu alitalu humainae. 7 Alitalu huteꞋya ani kanolatana anavaleꞋya amaufi hetinateneꞋya mage huꞋya hanavigae “Tanakaya hanaꞋa agimo tokiyaleti mani kavala humainaꞋe?” huꞋya hanavigae. 8 Hana-vigageno Alu Aotage AvamuꞋmoꞋa Pitana agupina hiya higeno mage huno humaine Kava vayaꞋmogatamaene vayatamaene haviho. 9 Mani aiyamoꞋa haviya humainea kanomona ali falu hutetana alitana kanale hutenaꞋe kea havisune hutama kaiyekea hulaꞋatetama na yateti mani kava nehaꞋe hutama taꞋahavi-negapi? 10 TaꞋa-havigayanagi mukiꞋamogatamaene mukiꞋa Isaleli veaꞋmoꞋyaene haviho. Nasaleti Yisasi Kalaisi agimoꞋa manima tamaufima heti-mainea kanomona alino kanale hutene. Ani Yisasina tamakaya yafaga yosale nilia hetama asaigeno fali-maineanagi Anumaya KotiꞋa fali-mainefiti ago ali hetitene. 11 Anumaya Koti kemoꞋa autaꞋmafina mage huno humaine

“Tamakaya yafa noma kiyana nago yafafena ‘Haviya hie.’ hutama atalayanagi menia ani yafamoꞋa tusiꞋa kanale yafane nomo ayetagenale ago malenae.” huno humaineane.
Ani yafana Yisasife humaine. 12 Ani kanomoꞋa agaiꞋage tagu tamena aligatigahie. MukiꞋa mopafi veapitila nago kanomo agileti tagu tamena aliokatigahigi Yisasina agaiꞋage agileti tagu tamena aligatigahie huno humaine. 13 Pitagani Yonigania tokiyaꞋage ke haꞋageꞋya haviteꞋya mage hae “Vae mani kanolatana afa kanolata maineꞋana avo nopina oꞋunaꞋa kanolanagi hanaꞋa huꞋana tusiꞋa kanale kea nehaꞋe?” huꞋya amakesa havi havi nehuꞋya “Vae mani kanolatana YisasiꞋene nemaiꞋa kanolatane.” huꞋya humainae. 14 Hayanagi aliꞋana kanaleꞋma hutenaꞋa kanoa anakaiꞋene heti-mainegeꞋya agaya yafe nagoꞋa havige havagea huoꞋanatenae. 15 “Kanisole vaya nopitila ataletana viꞋo.” huꞋya hunateteꞋya amakaiꞋamifi kea huge havige humainae. 16 Mage huꞋya hae “Ani tole kanolatana hanaꞋa hunatesune? Mama tokiya avame yana haꞋageꞋya mukiꞋa Yelusalemu nemaiya veaꞋmoꞋya ago age-mainagi hanaꞋa huta ali fala-kisune? 17 Havigu mani kemoꞋa alu kote kotega ute ete huyafenagi aluya huta ‘NagoꞋene mani agia oꞋayeꞋo.’ huta kahegi-natesune.” huꞋya humainae. 18 Anakaife ke hageꞋana aꞋageꞋya mage huꞋya anaumonola malenae “Yisasifena nagoꞋene veaꞋmogamina hamapaitana humaveotiꞋo.” huꞋya hae. 19 HageꞋana PitaꞋene YoniꞋene kenonaꞋamia mage haꞋe “Na tamakesa nehaviye Anumaya Koti aulagafi mainoꞋagi ta kele akavela malesuꞋe? Tamakai kelepi Anumaya Koti kelele hutama nehafi na tamakesa nehaviye? Tamakaitami fako hutama haviho. 20 TaꞋagaya YisasiꞋma humainea kavala agetaꞋa havimainoꞋa kavaꞋyaga fala okigahuꞋe.” huꞋana nehaꞋe. 21 HaꞋageꞋya anaikolisaya amakesa haviyanagi mukiꞋa veaꞋmoꞋya humainaꞋa kavala ageteꞋya Anumaya Koti agi alisaga nehageꞋya mage hae “Anaiko-lisunana veaꞋmoꞋya kelama-kigahae.” huꞋya nagoꞋene anaumonola maleteꞋya anatalageꞋana umainaꞋe. 22 Anima aiyama haviya humainea kanoma aliꞋana kanale hutenaꞋa kanomona kafuꞋa fotiꞋa (40) kafu humainea kanogiꞋya Anumaya Koti agi alisaga humainae. Yisasife amakupi malenaya veaꞋmoꞋya tokiya vaiꞋya Yisasi kema hufalote hisaya yafe Anumayamotega havige-mainae. 23 AnatalageꞋana anagaꞋanimoꞋya mainalega uteꞋana mukiꞋa ala mono note ala kava vayaꞋyagaene vayatamaene hanapaiya kea mo hamapai-mainaꞋe. 24 Mo hamapaiꞋageꞋya haviteꞋya nagoke amakesa haviꞋya Anumayamotega ke huꞋya mage huꞋya havige-mainae “Kava yagai Anumayatimogae mopaene ikaꞋene hage liꞋene mukiꞋa anifima hanea yaꞋyagaene talo humalenana kanomogae. 25 Kagaya kagai aliꞋya kanoa, tototimoꞋa TevitiꞋma avayafiti Alu Aotage Avamukaletila mage huka humainanane

‘NaꞋa higeꞋya Isaleli nofiꞋma omainaya veaꞋmoꞋya ‘Anumaya KotiꞋene tu hugahune.’ huꞋya havigu ke huꞋya amaipa kafa hemainae? Ma mopafi kava vayaꞋene vayatamaene AnumayamofeꞋene agaiꞋa tagu tamemaꞋa aligatigahe hutenea kanomofeꞋene amaipa haviya nehuꞋya kea neꞋvaiye?’ huno humaineane.
27 Mamona kelamage. Mani kumate alu aotage aliꞋya kanokaꞋa kagaikaꞋa taugafa aligatigahema hutenana kanomona kame hutesaya yafe HelotiꞋene Potiasi PailatiꞋene Yuta vea omainaya vayaꞋyagaene Isaleli vayaꞋene alitalu huꞋya mainae. 28 Kagayama nayoma huka ‘NaꞋa maꞋa hugahae.’ hukama havimainana kagesa aniꞋa hugahe alitalu humainae. 29 Menia Anumayatimoga manima tagaifema hamae vainelateꞋya hu kolima latesaya kema haya kea nehavika tahaꞋmao. Tagaya kagai aliꞋya vaya mainonagi kagaya tahaꞋmaegeta kolia ohuta kagai kea tokiyaꞋage huta hamapaisune huta kahavinegone. 30 Kayana maleka kali veala alika kanale huneꞋamateka kagaikaꞋa alu aotage nafaꞋnekamo agile tokiya avame yama hisuna tokiyakaꞋa lamio.” huꞋya Anumayamotega havinegae. 31 Havigageno Anumaya KotiꞋa amakayama mainaya nona alino kosi kosi hutegeno Alu Aotage AvamuꞋmoꞋa amakupina me hiya humainegeꞋya Anumaya Koti kema tokiyaꞋage huꞋya hamapaisaya yafena kolia ohunae. MukiꞋa Yisasina amakuꞋama aminaya veaꞋmoꞋya nagoke amaipale maineꞋya amaipa oꞋami aꞋami huꞋya mainae. 32 MukiꞋa Yisasi kema haviꞋya amakuꞋama aminaya veaꞋmoꞋya nagoke amaku amakesale maineꞋya nago kanomoꞋa agaiꞋage yafena ageteno “NagaiꞋnige yane.” huno ohunegi “MukiꞋa yana tagaiti yamaꞋage hane.” huꞋya humainae. 33 Hageno tusiꞋa tokiyaꞋa amamigeꞋya Aposolo vayaꞋmoꞋya “YisasiꞋa fali-mainefitila ago heti-maine.” huꞋya hamanepaigeno Anumaya KotiꞋa kayone hisaya yana neꞋamamino amaya humaine. 34 Amaya higeꞋya amakai amuꞋnoꞋamifina kavefena kafua ohu veaꞋne maineꞋya mopaꞋamia hanea veaꞋnene noꞋamia hanea veaꞋnene “Alu kanomo miya hisie.” huꞋya hageꞋya monea amamigeꞋya aliꞋya Aposolo vayaꞋmogamina momamigeꞋya kaveꞋamima omalenea veaꞋmogamina amaya huꞋya amamite amamite humainae. 36 Nago kanoa YosefeꞋe, nago agia Aposolo vayaꞋmoꞋya mage huꞋya malenae PanapasiꞋe huꞋya malenae. Ani agimoꞋa tagai kefina mage hie “Amaipa falu hisia ke nehia kanoe.” Ani kanomoꞋa Livai nofi kano maine. Saipalusi kumateti kanomoꞋa agaiꞋa mopa alu kano amigeno monea eteno amigeno ani monea alino Aposolo vaya me neꞋamamiane.